O sorteo da Copa da Costa será o 3 de abril en Baio

A Federación Galega de Fútbol confirmou onte que o sorteo da Copa da Costa realizarase o xoves da próxima semana en Baio.

O acto, que comezará ás 20.00 horas, terá lugar nunha sala do pavillón municipal baiés. Nesta edición poderán competir un total de 36 clubs. Se non hai baixas, na fase previa intervirán oito conxuntos, que xogarán as súas eliminatorias os días 13 e 20 do próximo mes.

Os equipos que en principio competirán son o Bergantiños, de Rexional Preferente; Soneira, Sp. Zas, Dumbría e San Lorenzo, de Primeira Autonómica; Cee, Ponteceso, Castriz, Fisterra, Muros, Monte Louro, Carnota, Baio, Camariñas, Corme, Porteño, Sofán, Esteirana, Malpica, Nantón e Buño, de Segunda, e Xallas, Corcubión, Muxía, Santa Comba B, Lira, Vimianzo, Mazaricos, Cabana, Corcoesto, O Pindo, Coristanco, Cerqueda, Alcaián e Atlético Pereiriña, de Terceira.

Quedan fóra o Bergantiños B e o Dumbría B, ao participar os seus primeiros equipos.

O prazo para acudir á Federación Galega de Fútbol, na Coruña, e darse de baixa na Copa rematará o 2 de abril.